Espéranto-France

30a de septembro : Internacia Tradukada Tago

2024-09-30T07:57:00Z

Mesaĝo de Universala Esperanto Asocio okaze de la Internacia Tradukada Tago, la 30-a de septembro 2024

El ĉiuj formoj de nejusta diskriminacio menciitaj en la Universala Deklaracio de Homaj Rajtoj, la plej subtaksata estas la diskriminacio surbaze de lingvoj. En mondaj aferoj, en scienco, en kulturo kaj en ĉiuj aliaj formoj de homaj rilatoj, la riĉa diverseco inter la lingvoj funkcias samtempe kiel fonto de scioj kaj esprimado, kaj barilo al la tutmonda komunikado.

Same, la relativa prestiĝo de certaj lingvoj, kaj ilia disvastiĝo, favoras certajn lingvojn super aliaj en difinitaj cirkonstancoj, kaj sekve ofte produktas nejustan diskriminacion.

La ĉefa faciligilo kaj egaligilo de komunikado inter la lingvoj, kaj sekve de la komunikado inter la homoj, estas aktuale la tradukado. Tradukado estas esenca vojo por konstrui pli justan mondon, alproksimigi popolojn, antaŭenigi dialogon, kaj krei interkompreniĝon kaj kunlaboron.

Tradukantoj kaj interpretantoj portas sciojn de unu lingvo al alia, disvastigas sciencon kaj kulturon, kaj, je individua nivelo, savas vivojn, ebligas pacon kaj helpas niajn malfortajn kaj persekutatajn gefratojn, ofte sub malfacilaj, eĉ vivminacaj, cirkonstancoj.

Kiel asertas la rezolucio pri la Internacia Tradukada Tago, respekto al kultura kaj lingva diverseco estas esenca antaŭkondiĉo por antaŭenigi spiriton de malfermiteco, egaleco kaj dialogo. La tradukada laboro estas grava subteno al la celoj kaj principoj de la Ĉarto de Unuiĝintaj Nacioj.

La laboro de Universala Esperanto-Asocio, kiu subtenas la ideon de dua, internacia lingvo por ĉiuj homoj, paralelas tiun de la tradukado : UEA konstante reasertas la gravecon de gepatraj lingvoj, kaj memorigas la internacian komunumon, ke ni devas pensi ankaŭ pri la lingva aspekto de la tri kolumnoj de UN : Paco, Evoluigo kaj Homaj Rajtoj. Same kiel tiuj tri aferoj integriĝas, lingvoj estas esenca elemento por aŭskulti kaj alproksimigi la tutan homaron.

En tiu ĉi tago, ni ree donas nian subtenon al multlingvismo kiel kerna valoro de UN, salutas la internaciajn organizaĵojn de tradukistoj kaj interpretistoj, kaj reasertas nian celon antaŭenigi, speciale per la Internacia Lingvo Esperanto, interkompreniĝon kaj estimon inter la popoloj.

Vidi konektite : La komuniko de UEA en Espéranto

Père Ubu parle en espéranto !

2023-09-08T06:11:43Z

Il y a 150 naissait Alfred Jarry, écrivain français qui fut en quelque sorte un précurseur des surréalistes.
Son œuvre la plus célèbre, Ubu Roi, traduite en espéranto sous le titre Reĝo Ubuo, a été publiée en 2023.
Le livre est disponible aux formats papier et électronique (epub) à la boutique d'Espéranto-France et sur lulu.com

- Kulturo

Internacia konkurso de poezio por junuloj

2018-01-21T15:40:36Z

Tiu konkurso, publikigita en la Oficiala Bulteno de la franca Ministerio pri Edukado, estis organizita de la Asocio « Poésie en liberté » (poezio tutlibera) ekde 1998.

Ĝis 2017, la poemoj estis nur franclingvaj. En 2017, partoprenis 4 000 junuloj el 20 landoj. En 2018, por la 20-a eldono, dank' al la ago de Espéranto-France, eblis ankaŭ verki poemojn Esperante.

Kiu povis partopreni ? Ĉiuj junuloj aĝaj de 15 ĝis 25 jaroj, el ĉiuj landoj.
La partopreno konsistas en sendo de neeldonita poemo, versa aŭ proza, kun maksimume 30 versoj aŭ 30 linioj. Kandidatoj principe rajtas sendi po unu poemon, sed eblas sendi po unu en ĉiu el la lingvoj franca kaj Esperanta.

Partopreno okazis nur rete ekde la 1-a de januaro ĝis la 30-a de aprilo 2018,
www.poesie-en-liberte.fr.

La ĵurio elektis la gajnantojn fine de majo.

En novembro 2018, tiuj estis invititaj dum 3 tagoj viziti Parizon, loĝante ĉe esperantaj familioj, kaj partoprenis grandan finan ceremonion. Samtempe, la poemoj estis eldonitaj en libro.

Vidi konektite : https://www.poesie-en-liberte.fr/prix-esperanto/

Teknika Vortaro de Greziljono

2016-06-05T10:14:57Z

Frédéric Lauriol ĵus eldonigis Teknikan Vortaron de Greziljono.
Ĝi estas dulingva (franca kaj Esperanta) kaj kostas 18 €.

Vidi konektite : Por legi la dokumenton (PDF-formato)

Vidu la novaĵojn de SAT-Amikaro.

Biblioteko Hippolyte Sebert

2016-02-05T10:09:17Z

Biblioteko Hippolyte Sebert estas biblioteko pri historio de Esperanto en Francio, ĉefe rilate la finon de la 19a jarcento kaj la komenco de la 20a jarcento.

Ĝi enhavas plurajn milojn da libroj kaj dokumentoj ĝenerale en Esperanto aŭ en la franca. La dokumentoj troviĝas en la kelo de la Ĉerizejo, la sidejo de Espéranto-France.

Du arkivistoj volontule laboras por indeksi la dokumentojn kaj skani kelkajn el ili. La ĝisnunaj indeksitaj dokumentoj troveblas ĉe la retpaĝaro de la biblioteko arkivo.esperanto-france.org.

Por kontakti la arkivistojn retmesaĝu al info@esperanto-france.org

Esperanto kaj turismo

2016-01-31T15:02:46Z

Reta listo de turismaj lokoj kun Esperanto estis kreita de Havra Esperantista Grupo.

Temas pri senpaga TTT-ejo, sen komerca celo, malfermata al ĉiuj por ebligi al ĉiu organizi sian vojaĝon tra la mondo, tra Esperantujo, aŭ esti informata.

Kio estas trovebla tie ?

La vojaĝanto tie trovos ĉiujn lokojn kie Esperanto estas uzata tra la mondo : kulturajn lokojn, gastigadon, restoraciejojn, amaskomunikilojn, lokajn vidindaĵojn kaj ĉiun ajn lokon, kiujn oni proponos, rilatanta al esperantista kulturo kaj turismo.

Vidi konektite : gvidilo.net

Havro estas industria kaj havena urbo, nordokcidente de Francio.

esperanto.paris

2015-05-06T21:32:46Z

La 1an de majo 2015, la federacio “Esperanto Parizo Francilio” malfermis sian retejon https://esperanto.paris/

Tiu nova retejo estas konceptita por adaptiĝi al ĉiuj aparatoj, precipe al la tabledoj kaj telefonoj, por kiuj ĝia adaptiĝema enpaĝigo ebligas facilan konsultadon de la retejo kaj provizas pligrandan legadkomforton.

Tiu retejo estas dulingva, en la franca kaj en Esperanto.

La franclingva versio de la retejo prezentas ĉiujn agadojn, celantaj la Parizanojn kaj la Francilianojn : kursoj, staĝoj, animadoj, prelegoj, koncertoj, projekciadoj... Tiujn agadojn, malfermaj al ĉiuj, ofertas volontuloj de la diversaj Esperanto-associoj de Parizo kaj de Francilio.

La esperantlingva versio venonte pliampleksiĝos por oferti al la vizitantoj kaj al la turistoj praktikajn kaj turismajn informojn por ilia restado en la ĉefurbo kaj ties regiono. Tiuj novaj rubrikoj naskiĝos okaze de la Universala Kongreso Lille 2015, kiu arigis 2700 esperantoparolantajn kongresanojn el 80 landoj kaj kies granda parto vizitis Parizon.

Vidi konektite : esperanto.paris

Semajno de Internacia Amikeco

2015-02-26T20:08:27Z

Jam de pli ol 40 jaroj la E-komunumo festas dum la lasta plena semajno de februaro la Semajnon de Internacia Amikeco, kiu pasas sub la devizo “Amikeco trans limoj”.

En sia rezolucio el 1954 Unesko notis i.a. « la rezultojn atingitajn per Esperanto sur la kampo de la internaciaj intelektaj interŝanĝoj kaj por la proksimigo de la popoloj de la mondo »”.

« En niaj vicoj solenante la Semajnon, kiu daŭras ĝis la fino de februaro, ni gardu kaj flegu la flamon de tiu amikeco, kiu signifas justecon, fratecon kaj pacon inter homoj kaj popoloj. Ni invitu kunfesti la Semajnon ankaŭ tiujn, kiuj nin najbaras, sed ankoraŭ ne estas esperantistoj. Ni montru al ili, ke Esperanto estas ankaŭ sinonimo de egaleco kaj solidareco inter la homoj kaj nacioj, ke Esperanto signifas respekton de la homaj rajtoj. Sed same kiel dum jaroj, tiel ankaŭ nun la salutvortoj interŝanĝataj en la daŭro de la Semajno donu al ni novan, vivigan energion por progresigi niajn agadojn kaj vastigi nian E-komunumon. »
Barbara Pietrzak, UEA-estrarano

Vidi konektite : sur le retejo de UEA

La Kastelo Haut-Koenigsbourg

2015-01-04T16:51:59Z

Se vi vizitas la kastelon Haut-Koenigsbourg en Alzaco, nepre petu la flugfolion por viziti per Esperanto.

Normale, ĝi estas videbla inter la aliaj lingvoj, sed ĝi rapide disvastiĝis pro la kuriozeco de la vizitantoj neesperantistaj. Pro tio, la laborantoj de la kastelo disdonas ĝin nur kiam oni petas.

Elŝutu la flugfolion en la PDF formato (648 Ko) :

Kastelo Haut-Koenigsbourg (flugfolio en Esperanto)

Vidi konektite : Legu pli ĉe Wikipedia

El komuniko de Cyrille Hurstel, Strasburga klubo.